Gedichten van Jan Bos Schilderijen en tekeningen van René Kuipers |
Dij wait van visken, mout waiten van netten dreugen | Operoatie Zoltkaamp 14 | Oskerd UQ 6 | Roofvizzen | Wilde keuken | Dreum |
Roofvizzen Ketaaier noa middernaacht, hoaven van Lauwersoog is leeg, zee is vol kotters en schienwaarpers, din allint nog toplichten. Wie rözzen deur branding hin noar boven Oamelaand tou, kop wort lichter, moag bulkt, over reling hangen , vizzen vouern. Meders geven daipte aan en wiend, van twij noar drij noar vief oet Oost. Doodtij, strunen van straand tot twaalf miel tou. Körde golfslag, zegt schibber van ZK zeuventien. Vanòf baank bie stuurboord, zailen aanermans lichten veur bakboordroamen laans, verdwienen ien lucht, doeken, kommen weerom, trekken tegendroadse ovoalen deur achterroamen Noa zoveulste trek, oetzeven , genoat ien ies, legt schibber drij vizzen op n ribbelrubberklaaid van toavel, n spiering, n heern, n wijting en n genoat. Doodtij, te helder wotter paarst oet boomgat. Genoaten worren opjagd deur rovers, kiek n spiering mit snoukebektaanden, heern gaait, aargst binnen filaaine wijtings, genoaten vluchten overaal en naargens. k Striek n genoat over zien laange vuilsprieten. Hai wipt met n klap van steert, n vout ien lucht, genoat vaalt omdeel, angst ien kop, met vermuide , kwoaie, rooie parabool ogen. Zo ook genoatviskers van Wad en Noordzee, opjagd deur monsterlieke roofvizzen, votjagd van heur aiwenolle visgronden deur: nuim ze mor spierings en wijtings Jan Bos ien Hogelaandster toal |