|
Diekshörn Nat veujoar, stoalen ploaten liggen ans n looppad op leutje kerkhof bie boerenploats Der is buurtbewoonster begroaven, poar meders laange verhogen van swoare klaai, vollegd mit bloumstukken. Tegen zuudwester storm ien, wiendkracht negen, poast n blinde uurwaarkopwiender. Geel reflectievèst, hond ien beugel aan linker haand, rood-wit blokte stok ien aner. Zunnebril ien graauwe haastdag vaalt vot op. Klokkeman swaait mit taststok over brugke, drukt mit knij kerkhofklaphekje wied open veur hom en hond, broene leghörns koakeln oetzied. Hai prikt mit stok aingoal richten toorn tou of ale ploaten der nog liggen van eerdoags. Noadat uurwaark ien toorn opwonnen is komt e noar boeten tou, sluut deur òf, luustert boeten op mebiel of toornklok liek lopt om negen-uur-daareg. Op menuut òf sloagt klok van Collator Leeuwe, Wilkens, Veeker en pestoor Sicman oet kerk van 1658. Vandoag is e ainegste ien fluitende wiend op kerkhof. Dut poar tree opzied, vuilt woar verhogen is. Staait n zet stil aan westelke kopse kaant. Nikkopt noar t oosten, lippen trillen. Wist mit buusdouk troanen vot vanachter zunnebril Swaait n langzoam òfschaaid mit zien stok, verdwient, swiegsoam, deur t dichtklappende hek, mit zien geel reflectievest, bril, stok en hond. Tòt over zeuven doagen. |
  Schilderijen van René Kuipers Gedichten van Jan Bos 
|
|
 |
 |
 |
 |
 |
 |
|